Kasaysayan sa Parokya(unang gula)

(Ang nagsulat niining kasaysayan nagbase sa interview nila Sis. Antonia Ragaza, Sis. Necipura “Nicy” Cantal ug Sis. Viginia “Engine” Abadillla)

     

Sa tuig 1980, nasulayan ang kasibut sa pagtuo sa simbahan sa Taga Tuyan dihang nahanaw ang ulo sa Birhen sa Sto Rosaryo diin naumol ang Sto. Niño Crusader ug nakabaton og santos nga misa matag adlaw nga Domingo sa kapilya sa Tuyan.

Niadtong tuig 1986, laing pagsulay ang nitumaw dihang ang taga Tuyan nga kanhi Rector sa San Carlos Seminary nga si Msgr. Felino Caballa nipahibawo pinaagi sa iyang igsoon nga si Paulina Campo nga ang Artsidyosesis nagplanong himuon parokya ang Inayagan ug mahisakop niini ang Tuyan.

Nagtigum dayon ang mga membro sa Comite de Festijos o opisyales sa kapilya nga gipangulohan sa presidente nga si kanhi Vice mayor Urbano Regis.

       

Nakadesisyon ang mga opisyal nga dili kini magpasakop sa Inayagan ug magpatabang kang Msgr. Caballa aron mahimong parokya ang Tuyan.

     

Ang Regis ug kaubanan niadto kang Msgr. Caballa sa

seminaryo aron pagpangayo sa tambag.

Si Msgr.Caballa nisugyot dayon sa mga opisyales sa kapilya sa Tuyan nga mananghid una ngadto sa kura paruko sa simbahan sa Naga kun musugot ba kining maparokya ang Tuyan.

     Si Nicy Cantal maoy nag-una sa pagduol kang Fr. Mamerto Mambaje sanglit suod man kini sa pari. Ug dihang nahibawo sa katuyuan sa taga Tuyan, si Fr. Mambaje daling niingon nga muhimo una kini og petisyon ug papirmahan sa mga mulupyo sa Tuyan.

       

Sa Hinapus sa bulan sa Mayo  tuig 1986 nahuman ang petisyon nga gipirmahan sa kapin sa 2 mil ka mga tawo bisan pa man og may pipila ang nipakita og pagsupak sa maong lakang.

      

Ang maong petisyon gihatud dayon sa mga opisyales sa kapilya  ngadto sa buhatan ni Fr. Mambaje.

     

 Si Fr. Mambaje nga nisaad usab sa pagtabang sa taga Tuyan, personal nga nidala sa maong petisyon ngadto sa buhatan ni Cebu Archbishop Ricardo Cardinal Vidal.

     

Pipila ka adlaw human mahandos ang petisyon, usa sa mga opiysales sa Artsidyosesis nga mao si Msgr. Virgilio Yap ang hilum nga nibisita sa Tuyan aron pagpahigayon og pakisusi kun angayan bang himuong parokya ang Tuyan.

      

Pipila sa mga parokyano ang gipangutana ni Msgr. Yap kun nakauyon ba kini sa pagatukuron nga parokya sa Tuyan ug niadto dayon siya kang Fr. Mambaje sa Naga aron mapahibawo sa iyang pakisusi.

(Ang sumpay ipagawas sa sunod nga isyu sa Mantalaan)