Birthday ni Mama Mary gisaulog

     Ang Parokya sa Tuyan niduyog sa Kristohanong katilingban sa tibuok kalibutan sa pagsaulog sa adlaw nga natawhan ni Mama Mary, ang inahan ni JesuKristo atong manunubos, niadtong Huybes, Septembre 8, 2011.

     Ang matag bulan nga awrora sa parokya nga sagad ipahigayon matag unang Sabado sa kaadlawon gihimo kini  sa nahisgutanng adlaw.

     Kini agi og pagpahinungod ug paghatag og gibug-aton sa maong kasaulogan.

    Human sa awrora sa mga alas 4:30 sa kaadlawon, gi-sunod usab ang santos nga misa sa alas 5:00 sa buntag nga gisaulog sa Padre Kura sa  Our Lady of the Holy Rosary Parish, Fr. Alvin Codilla.

   Ang mga debotos sa mahal nga Birhen dinhi sa parokya  nga niduyog sa paghalad og pag-ampo ug pagpangadye sa santos nga rosaryo alang sa patron sa simbahan sa Tuyan.

    May gipahigayon usab nga santos nga misa sa alas 5:30 sa hapon aron makasimba ang uban nga parokyano nga wala nakasimba sa buntag.

Lay Ministers nisalmot sa Archdiocesan Recollection

     Gitambungan sa mga Lay Ministers sa parokya sa Tuyan ang gipahigayon nga Arch-diocesan Recollection & Liturgical Formation for Renewal of Extra-Ordinary Ministers of Holy Communion didto sa Mariner’s Court sa ALU Compound, Pier 1, Cebu city niadtong Septembre 17, 2011.

      Ang 19 ka mga Lay Ministers sa Tuyan nga nisalmot sa maong kalihukan gipangulohan sa presidente mismo nga si Brod. Wilfredo Alferez.

     Ang Chairman sa Commisison on Worship sa Ar-tsidyosesis sa Sugbo nga si Msgr. Cris Garcia nipahinumdum sa mga Lay Ministers sa kamahinungdanon sa ilang tahas nga mao ang pag-abag sa Kura Paruko sama sa gihimo ni Santo Lorenzo Ruiz de Manila nga maoy patron sa mga Lay Minister. 

     Ang maong recollection maoy gikinahanglanon nga preprasyon alang sa renewal sa mga Lay Minister sa Tuyan nga pagahimuon karong Septembre 25, 2011 atol sa alas 8:00 A.M. Sunday Mass.

Fiesta

      Ang mga Lay Minister magsugod sa nobenaryo ni San Lorenzon sa Septembre 19, 2011 ug ang kapistahan saulogon usab sa Septembre 28 adlaw nga Miyerkules diin ipahigayon ang prosesyon sa alas 4:00 sa hapon sa dili pa ang misa sa alas 5:30 sa hapon. (Jeralyn Deiparine)

PYCC sa Tuyan nipresentar sa CICC

     Ang mga talented nga membro sa Parish Youth Coordinating Council kun PYCC sa Tuyan nipresentar og sayaw atol sa gipahigayon nga Dinner for a Cause nga gipahigayon sa Commission on Youth sa Archdiocese sa Sugbo didto sa Cebu International Convention kun CICC niadtong Agusto 27, 2011.

     Ang PYCC  nga gipangulohan ni John Jason Francisco maoy nisayaw sa theme song sa Local World Youth Day ug ingon man ang “Make a Stand.” Ang Dinner for a Cause nga gisalmotan sa PYCC sa Tuyan nagtinguha

sa pagpangita og igong pundo aron may magamit ang Youth Commission sa Artsidyosesis sa Sugbo alang sa kahingpitan sa gitukod nga Commission on Youth Center Project nga nahimotang  sa duol sa Cebu Metropolitan Cathedral sa siyudad sa Sugbo.

    Ang maong proyekto maoy gamitong nga kahimanan aron mas mulig-on pa ang kahugpungan sa mga batan-on sa tibuok Artsidyoses sa Sugbo.

    Ang presentasyon sa PYCC sa Tuyan maoy usa sa natampo sa parokya alang sa maong proyekto.(Genevieve Francisco)   

CWL Juniors giinstalar

     Formal nga giinstalar ni Fr. Alvin Codilla ang mga bag-ong  membro sa Catholic Women’s League kun CWL Juniors niadtong Septembre 11, 2011 adlaw nga Domingo.

     Suma pa ni Sis. Stella Saldon ang pangulo sa CWL nga may 17 ka mga batan-on ug bag-ong membro sa CWL Jr. sa parokya sa Tuyan.

     Atol sa maong instalasyon, ang presidente usab sa CWL sa tibuok Artsidyosesis sa Sugbo Sis. Bebot Dizon maoy niasister ni Sis. Stella sa nahisugtang kalihukan uban  sa mga CWL Seniors.

    Gitumbok ni Sis. Stella nga sagad sa mga membro sa CWL Jr. mga stuyante nga nisalmot sa pipila ka mga organisasyon sa parokya.

     Iyang gipasabut ang katuyuan sa pagtukod sa CWL Jr. mao nga may makaabag sa mga CWL Seniors sa daghang mga kalihukan sa parokya sa Tuyan.

     Ang maong kahugpungan  mao usab ang nagsilbing ang-ang aron mahimo usab kining mga membro sa CWL Seniors. (Annjie Babayson)

Kasaysayan sa parokya sa Tuyan(Ikatulong gula)

(Ang nagsulat niining kasaysayan nagbase sa interview nila Sis. Antonia Ragaza, Sis. Necipura “Nicy” Cantal ug Sis. Viginia “Engine” Abadillla)

     Sila si Virginia  Abadilla ug Antonia Ragaza niingon nga taliwala sa pagpaabut sa mga taga Tuyan sa bag-ong pari, ang gidetistino nga pari sa Tuyan nga si Rev. Fr. Benjamin “Ben” Cortes hilum nga nipahigayon og “ocular visit”  ug nisusi sa mga lugar nga  sakop sa parokya sa Tuyan niadtong katapusang semana sa bulan sa Hulyo tuig 1986.

     Si Fr. Cortes nibalik sa Tuyan sa Agusto 9,1986 nga walay ni bisan usa nga nisugat kaniya sama sa gihimo kaniadtong Hunyo 29. Apan niining higayuna si Fr. Benjamin Cortes niduol ni Antonia Ragaza ug Nicy Cantal, nisulod sa kapilya nga gitagbo sa mga Legionnaires nga gipa-ngulohan ni Virginia Abadilla nga nagtigum sa sulod sa kapilya.

      Gipatawag dayon ang ubang mga mga opisyales sa kapilya aron pagpakighimamat ni Fr. Ben Cortes kinsa temporaryong gipapuyo sa balay ni Talina Bolo samtang wala pa hingpit nga natukod ang kombento sa Tuyan.

      Si Fr. Ben Cortes nisugod sa pagsaulog sa santos nga misa sa kapilya sa matag adlaw nga Domingo hangtud sa bulan sa Oktobre.

      Ug niadtong Oktobre 12, 1986 sa alas 10:00 ang takna sa buntag, adlaw nga Dominggo, ang tinugyanan ni  Cebu Archbishop Ricardo Cardinal Vidal nga gipangulohan sa Archbishop Coadjutor, Msgr. Manuel Salvador nihimo sa seremonyas alang sa pormal nga pagtukod sa Our Lady  of the Holy Rosary Parish sa Tuyan.

     Sulod sa maong seremonyas gibasa ni Msgr. Manuel Salvador ang decreto nga gatimaan sa nahisakop sa bag-ong parokya nga gilangkuban sa barangay Cantao-an ug mga sitio sa Tayad-tayad, Magdooc, Cayam ug Tabtuy.

     Ang katapusang bahin sa maong seremonyas mao ang pagpahiluna ug pag-instalar ni Fr. Ben Cortes isip maoy labing unang Kura Paruko sa parokya sa Tuyan.

     Si Fr. Ben Cortes niumol usab dayon sa labing unang Parish Pastoral Council kun PPC nga gilangkuban ni Arthuro Tamarra isip presidente, Restituto Pañares isip bise presidente, Secretary si Nicy Cantal ug Tresurera si Luzminda “Amen” Lapitan.

   Gitukod usab ni Fr. Ben Cortes ang siyam ka mga Kabanayan nga gilangkuban sa Suba, Magtalisay, Isdaan, Tagbuy, Kalubihan, Pa-naghiusa, Cayam ug Cantao-an.

     Ang PPC  ug ang mga Kabanayan maoy kaabag sa Padre Kura sa pagdumala sa parokya sa Tuyan.

(Ang musunod nga gula mao ang  kasaysayan sa patron sa pa-rokya ug Sakay-sakay)

Grand motorcade giandam na

  Ang chairman sa Grand Motorcade alang sa pagbukas sa mga kalihukan sa Silver Anniversary sa pagkaparokya sa Tuyan nipahibawo nga han-ay na ang rota alang sa Grand Motorcade sa parokya karong Oktobre 1, 2011, adlaw nga Sabado.

     Matud pa ni Hector Lapitan nga sigon sa nasabutan ang assembly time sa alas 12:00 sa udto ug magsugod ang motorcade sa ala 1:00 sa hapon.

     Manukad kini sa simbahan sa Tuyan mupaingon sa Talisay, muliko sa eskena Pooc padulong sa City hall sa Talisay ug mudemano sa eskena Pooc paingon sa Highway.

     Gikan sa Highway mudemano paingon sa Cantao-an balik sa Highway sa Naga, demano na usab paingon sa Uling ug mu-U turn balik sa Naga dayon demano usab paingon sa Tinaan ug mu-U turn na usab balik na dinhi sa parokya sa Tuyan.

    Si Choky Repollo nga maoy in-charge sa arrangement sa Motorcade niingon nga may sakyanan nga may sound system alang sa imahe sa Birhen sa Santo Rosario diin tukaron ang mga Marian Songs samtang ang usa ka sakyanan nga may sound system gihapon balikbalik sa pagpatukar ang theme song sa Silver Anniversary. Si Brod. Hector subling nipahinumdum sa musalmot sa pagrehistro sa ilang sakyanan.

Catechist in-service training malampuson

      Malampuson kaayo ang gitambungan sa mga Katekista sa parokya sa Tuyan sa gipahigyaon nga “In Service Training Seminar” niadtong  Septembre 16,2011 adlaw nga Biyernes didto sa Pastoral Center sa lungsod sa  Minglanilla.

     Ang tanang mga katekista sa Tuyan nga gipangulohan ni Sis. Engine Abadilla nitambong sa usa ka adlaw nga “In Service Training Seminar” sa nahisgutang lungsod .

    Si Sis. Susana Banal nga usa sa nakatambong sa maong training niingon nga nakalig-on sa ilang katungdanan ang gipaambit sa speaker nga si Rev. Lor Fr. Jaque. (Charis Quiros)

Kasaysayan sa Parokya sa Tuyan(Ikaduhang gula)

Ang nagsulat niining kasaysayan nagbase sa interview nila Sis. Antonia Ragaza, Sis. Necipura “Nicy” Cantal ug Sis. Viginia “Engine” Abadillla)

Sulod sa pipila ka adlaw nga pagtuon ug pakisusi, ang Presbyterian Council ug mga Diocesan Consultants nipaluyo ni Cebu Archbishop Ricardo Cardinal Vidal sa pagtugot nga mahimong parokya ang kapilya sa Tuyan nga mahimong nang Our Lady of the Holy Rosary Parish.

     

Human aprobahi sa Cardinal ang petisyon sa taga Tuyan, si Cardinal Vidal personal nga nisangon ngadto kang Fr. Mambaje nga nahimo nang parokya sa kapilya sa Tuyan ug ipahibawo dayon kini ngadto sa taga Tuyan.

     

Si Fr. Mambaje dali usab nga nipatawag ni Nicepura “Nicy” Cantal aron pagtug-an nga gisugo siya ni Cardinal

Vidal sa pagpahibawo sa katawahn sa Tuyan nga aprobado na sa cardinal ang petisyon niining mahimong usa ka parokya.

     

Si Cantal nipahibawo usab dayon sa kadagkuan sa kapilya sa gihulagway nga labing maayong balita sa Tuyan nga gikamaya kaayo sa katawhan sa Tuyan.

     

Ang maong balita kilapay usab pag-ayo ni Msgr. Felino Caballa kinsa usa sa nangusog nga mahimong parokya ang kapilya sa Tuyan.                    

     

Si Msgr. Caballa nga nagpakisayod sa kalambuan sa pagkaparokya sa Tuyan, nipahibawo usab dayon ngadto sa taga Tuyan pinaagi gihapon sa iyang igsoon nga Paulina Ocampo nga sa bulan sa Hunyo sa tuig 1986 muabot na ang bag-ong pari nga idestino sa Tuyan.

Sigon pa ni Virginia “Engine” Abadilla nga niadtong Hunyo 29, 1986 ang katawhan sa Tuyan nagtapok sa bakanting luna atbang sa Rikio duol sa General Hospital, ang utlanan sa Tuyan ug sa Inayagan. Kini aron sugaton ug paghangop  sa pag-abut sa bag-o ug labing unang kura paruko sa parokya sa Tuyan.

     

Sulod sa pipila ka oras nga pagpaabut sa pari, niabut si Msgr. Caballa gikan sa siyudad sa Sugbo ug Fr. Mambaje gikan sa Naga kinsa niduyog sa katawhan sa Tuyan sa paglakaw paingon sa kapilya sa Tuyan.

     

Dihang niabut na kini sa kapilya sila si Msgr. Caballa ug Fr. Mambaje nipahibawo sa katawhan sa Tuyan nga malangay una ang pag-abut sa pari tungod kay padayon pang gihikay ang papales alang sa “parish erection” o dokrina alang sa pagkapa-rokya  sa Tuyan.

      

Ang pagkabawo sa mga parokyano sa pagsugat ug pahangop sa labing sa unang pari nga madestino sa Our Lady of the Holry Parish sa Tuyan gikaguol ug gikasagnguyo kaayo sa mga parokyano. 

(Ang sumpay ipagawas sa sunod nga isyu sa Mantalaan)