BEC send off gipahigayon

Gipahigayon ang “send off” sa mga parokyano sa simbahan sa Tuyan nga nakalampus sa pipila ka adlaw nga BEC Seminar niadtong Hulyo 17, 2011.

 

Si Fr. Alvin Codilla nga maoy nidumala sa maong kalihukan subling nipasabut sa kamahinungdanon sa BEC sa parokya. (Charis Quiros)

Ang theme song sa Parish Silver Anniversary: Parokya sa Hiniusang Katilingban

Ni Genevieve Francisco

 

Sa labing unang higayon, nadunggan sa mga parokyano ang theme song sa Silver Anniversay nga giulohan og “Parokya sa Hiniusang Katilingban” nga gicompose ni Annabelle Salvo  ug music gikan sa Mary’s Youth Chorus.

     

Kini human gitugtug ug gisayaw sa mga membro sa Parish Youth Coordinating Council uban sa presidente niini nga si Engr. John Jason Francisco atol sa paglusad sa mga kalihukan sa Silver Anniversary niadtong Domingo.

Si Fr. Alvin Codilla niawhag sa mga parokyano nga sag-uhon ug kantahon kanunay ang theme song sa Silver

Anniversary ug anaa ang liriko sa “Parokya sa Hiniusang Katilingban:”

Sa atong pagpuyo niining katilingban

Kita nanginabuhi sa usa ka katuyuan

Ang mahalaran ang Dios ug ang isig kaingon

Kalipay ug paghigugma nga atong ihatag

Ug karon sa masadyaong nga pag-awit

Churos:

Kita tanan maghugpong sa pag-alagad

Maghiusa sa paglambo sa atong parokya

Dinuyugan sa pagdayeg ug mga pasalamat

Alang sa Dios nga atong Amahan

Ipadayon sa tanan nga ka-tuigan

Inubanan sa pagpangaliya ni Santa Maria

Tana ! Mga parokyanhon, paambitan ta

Ang Diosnong paghigugma

Mga kabatan-onan atong amomahon

Tanan mga katawhan kanunay pagadasigon

Aron malamdagan ugmatudloan

Sa tiunay nga pagtuo sa Diosnong kaalam

Bridge:

Bisan pa man sa tanan nga kalisdanan

Mulahutay kita sa pag-alagad

Kitang tanan maghugpong sa pag-alagad

Sa kasing-kasing ug hunahuna nagkahiusa

Pinaagi sa Grasya sa Espiritu Santo

Pagadaygon ta ang atong Amahan

Maayong pulong isangyaw ug atong puy-an

Ipadayon sa tanan nga katuigan

Sa pangaliya ni Maria ang atong Inahan

Tana mga parokyanhon!

Ang parokya atong palambuon

Sa hiniusang tingog, pag-awitan ta

Ang Diosnong paghigugma.

Simbahan sa parokya pakonsagrahan

Ang kura parokya sa parokya sa Tuyan, Fr. Alvin Codilla nisugyot nga ang simbahan sa Tuyan angayan nga konsagrahan.

Kini aron mahingpit ang kasagrado sa  simbahan  sa Our Lady of the Holy Rosary sa Tuyan, Naga sa dili pa saulugon sa parokya ang Silver Anniversary karong Oktobre 12, 2011.

Matud pa ni Fr. Alvin nga iya nang giandam ang imbitasyon alang kang Msgr. Cris Garcia, ang pangulo sa Ministry on Worship sa Artsidyosesis sa Sugbo, sa pagbisita ug muobserbar sa simbahan.    

Kini aron makahatag og mga sugyot sa angayan buhaton sa pa-rokya alang sa pagkonsagrar niini.

Matud pa ni Fr. Alvin nga ang pagkonsagrar sa simbahan sa Tuyan preparasyon alang sa gitinguha nga madeklarar sa Arsobispo sa Sugbo ang Tuyan nga “Special Year of Grace” isip buhing handumanan sa kasaulogan sa Silver Anniversary sa parokya.

Silver Anniversary Souvenir Items gipamaligya na

 Ni Jeralyn Deiparine
Ang Ministry on Temporalities nga gipangulohan ni Sis. Emie Alferez uban sa PYCC nagsugod na sa pagpamaligya sa mga souvenir items sa Silver Anniversary.

Kini gilangkuban sa fans, mugs, opener, key chain, magnetic sheet ug bag tag.

Parish Silver Anniversary Activities formal nga gilusad

Si Fr. Alvin Codilla ug Parish Pastoral Council Pres. Lydia Lapitan

Formal nang gilusad niadtong Domingo, Hulyo 24, 2011,  ang mga importanting mga kalihukan sa Silver Anniversary kun ika-25 ka tuig nga kasumaran sa pagkatukod sa parokya sa Our Lady of the Holy Rosary sa Tuyan, Naga nga gipahigayon atol sa matag santos nga misa sa Domingo.

Si Fr. Alvin Codilla ug PPC President Sis. Lydia Lapitan ingon man ni PPC Vice President Nicy Cantal maoy nibukas sa listahan sa gikatakdang mga kalihukan sa Silver Anniversary gikan sa Oktobre 1 hangtud Oktobre 12,2011.

Ang mga kalihukan sa ika-25 ka tuig nga kasumaran   mao ang musunod:

Oktobre 1—Grand Motorcade sa tibuok Bikaryato sa alas 2:00 sa hapon gikan sa simbahan sa Tuyan paingon sa Tabunok, San Isidro, Talisay city, Mohon, National Highway, Cantao-an,  Naga city,  Langtad, balik sa Naga city, U-ling ug balik dinhi sa simbahan sa Tuyan.

Oktobre 2   — PPC  meeting.

Oktobre 3   — 7:00 PM sugod sa Misa Nobena. Ug 8:30 PM  Brod. & Sis. Kabanayan chairperson.

Oktobre 4    -- Misa nobena sa 7:00 PM,PPC Nite sa 8:30 PM

Oktobre 5    -- Misa nobena sa 7:00 PM, Night with Mary ug PYCC Grand Reunion sa  8:30 PM.

Oktobre 6   -- Renewal of vow sa 1st 25 couples sa 10:00 AM, misa nobena sa 7:00 PM  ug Brgy. officials sa 8:30 PM

Oktobre 7   -- Misa nobena sa  5:30 PM, Dinner for a Cause  & Concert adto sa Minglanilla Sport Complex sa alas 7:30 sa gabii.

Oktobre 8   -- Misa nobena sa 7:00PM  ug Disco sa 8:30PM

Oktobre 9  — Ipahigayon ang Day with the Aged sa alas 2:00 sa hapon ug misa nobena sa 7:00 PM

Oktobre 10 -- Misa nobena sa 7:00 PM

Oktobre 11 -- Mass Wedding sa 0:00 AM alang sa mga nagpuyopuyo sulod na sa  lima ka tuig pataas. Motorcade sa Prince & Princess sa  2:00PM, prosesyon sa 4:30PM, misa nobena sa 7:00PM ug Coronation Nights sa alas 8:30 PM

Oktobre 12 -- Pontifical Mass  sa 10:00 AM uban ni Cebu Archbishop Jose Palma, presider & preacher. Dinner sa mga pari ug awardees sa 7:00 PM ug recognition/awarding sa mga Outstanding Parishioners sa 8:00PM.

     
Si Fr. Alvin nihangyo sa parokyano nga muhatag sa ilang siyento porsyento nga suporta aron mulampos ang mga kalihukan sa Silver Anniversary sa Our Lady of the Holy Rosary Parish.