Praise and Worship gisuportahan sa PYCC

Ni Genevieve Francisco     

Ang Parish Youth Coordinating Council kun PYCC nipaluyo sa  pagahimuon nga “Praise  and Worship Concert” karong umaabut Hulyo 30,2011  ngadto sa Blessed John Seminary sa Mabolo siyudad sa Sugbo. 

Si Cebu  Archbishop Jose Palma niindorsar sa maong konsiyerto nga pagasugdan sa usa ka santos nga misa sa alas 5:00 sa hapon ug sa alas 6:30 sa gabii ang concert. Kini tungod kay  ang maong kalihukan usa man ka fund raising sa “Family of United and Empowered Leaders” (The 8^th District of the Commission of Youth-Archdiocese of Cebu). May limitadong ticket alang sa nahisgutang concert nga tag 75 pesos alang sa interesadong mutan-aw. Ug ang kita niini gitagana alang sa pagtukod sa bag-ong archdiocesan youth center.

Alang sa mga batan-on nga musalmot tawag lang sa Commission on Youth Office sa telephone number 253-0173.

                                

Catechism sa Eskoylahan nagsugod na

Ang pangulo sa katekista sa parokya sa Tuyan, Sis. Engine Abadilla nitug-an nga nagsugod na ang catechism sa publikong tulunghaan sa Tuyan ug sa Cantao-an niadtong adlaw nga Lunes.

Kini human gipahigayon ang “send off” ceremony  sa mga katekista niadtong adlaw nga Domingo, Hulyo 3,2011  uban sa bendisyon sa padre kura nga siFr. Alvin Codilla.

Si Sis. Engine nagpasala-mat sa mga principals sa Tuyan Central Elementary School, Tabtuy National High School, Cantao-an Elementary School ug Cantao-an National High School sa pagtugot sa catechism sa  mga kabataan.(Charis Quiros)

Souvenir program alang sa Silver Anniversary giandam na

Gipangandaman na sa Souvenir Program Committee ang special nga souvenir program alang sa Silver Anniversary  sa Our Lady of the Holy Rosary Parish sa Tuyan.

Ang kometiba nga gipangulohan gihapon ni Sis. Jane Villarino nakadesisyon nga colored ang tanang pages hi-nungdan nga musaka usab ang prisyo sa sponsorship sa matag pahina. Kini gilangkuban sa 5 mil sa back page, 4 mil sa luyo sa front page ug 3 mil ang inside pages.

     
Tungod kay makasaysayanon man ang Silver Anniversary, gisabutan nga ang tanang mga kahugpungan, kabanayan sa parokya apil na ang kapilya mu-sponsor og usa ka pahina sa souvenir program diin ibutang ang mga opisyales ug mga picture sa mga kalihukan sa kahugpungan aron kini makita ug mahinumduman sa tanan.

    
Si Fr. Alvin Codilla niingon nga gikinahanglang i-release ang souvenir program sa adlaw gyud sa selebrasyon sa Silver Anniversary sa Oktobre 12, 2011 aron may mabasa ang mga parokyano.

    
Tungod niini, ang mga solicitation letters ipang-apod-apod sugod karong bulan sa Hulyo kuha sa Agusto.

Concert sa parokya ibalhin sa Minglanilla

Nakadesisyon ang kinatibuk-ang mga opisyales ug membro sa Parish Pastoral Council kun PPC nga ang gikatakdang konsiyerto sa mga kaparian sa Oktobre 7,2011 ibalhin ngadto sa sports complex sa lungsod sa Minglanilla.

     
Kini tungod kay ang School Division Superintendent sa Naga nga si Dr. Caridad Labe wala musugot nga gamiton ang school grounds sa Tuyan Central School tungod sa pagtuo  tuo nga ang kabtangan sa gobierno dili angayan ilambigit sa relihiyusong mga kalihukan.

      
Si PPC Vice Pres. Nicy Cantal nibasa gyud atubangan sa PPC members ang unod sa  sa text message nga nadawat niya gikan ni Dr. Labe nga gikahibulong pag-ayo sa PPC members.

     
 Tungod niini, si Fr. Alvin Codilla nisuna sa mga PPC members kun musugot ba kini nga ang konseyerto ibalhin sa Sport Complex sa lungsod sa Minglanilla nga mas hamugaway ug mas komportable pa bisan kun mag-ulan itande sa Tuyan Central School grounds ug minus usab ang abang sa sport complex kay gipanag-iya kini sa munisipyo.

    
Ang PPC members niboto pabor nga adto sa Minglanilla Sports Complex ang Dinner for a Cause ug Concert sa Cebu Clergy Performing Arts sa Agusto 7 ning tuiga. Si Fr. Alvin  nisangon dayon ngadto kang Vangie Cardenas, Leah Villarmea, Nicy Cantal ug PPC officials sa pagpananghid sa mayor sa Minglanilla.

Kapin sa 40 mil pesos na lang ang kulang

Gireport sa Parish Pastoral Council (PPC) Treasurer Sis. Edith Lazaga nga niabut na og P 238,900.00 pesos ang natigum sa parokya alang sa pagpalit sa road right of way sa lote paingon sa luna ngagidonar ni anhing Msgr. Felino Caballa sa may Sambag nga gipanag-iya ni Sibonga mayor Lionel Bacaltos.

        
Matud pa ni Sis. Edith nga kapin sa 46 mil na lang ang kulang aron hingpit nang ma-

bayran ang 275 mil pesos nga lote sa road right of way. 

       
Hinuon niingon si Sis. Edith nga wala pay labot niini ang pipila ka mga Kabanayan nga wala pa maka-remit sa ilang   mga pledges samtang ang uban aduna pay ikapuno sa unang nahatag na sa parokya.

      
Si Brod. Hector Lapitan nga maoy gitahasan sa parokya sa pagpakigsabut ni mayor Bacaltos niingon nga ganahan kaayo ang mayor sa pagtabang sa parokya apan dili na   kini makahatag pa og dugang lugway sa bayad.

      
Kini ang hinungdan nga si Fr. Alvin Codilla niingon nga mas maayong hingpit na mabayran ang mayor karon gyung bulan sa Hulyo kay basin og mausab unya ang iyang  hunahuna labot sa prisyo okaha ang pagbalikya sa nahisgutang luna.

    
Matud pa ni Fr. Alvin nga ang hingpit nga deadline sa tanang mga pledges karon gyud Hul-yo 16, 2011.

     
Samtang gipahibawo ni Fr. Alvin nga ang 275 mil pesos bayad lang kini sa lote wala pay labot niini ang buhis, pagtransfer sa land title, documentary sa lote ug uban pa nga posibling muabot ngadto sa 320 mil ang gikinahanglanon sa parokya.

     
 Busa giawhag ni Fr. Alvin ang mga parokyano sa pagtabang og tampo sa simbahan.

      
Si Sis. Edith ug PPC auditor Sis. Lita Du niingon nga ang nakahatag na sa ilang mga pledges alang sa road right of way project sa parokya sa Tuyan mao kining musunod:

Fr. Alvin Codilla.............................................  P 8,000

Comfradia de Sto.Niño...................................      3,000

Social Communication Ministry.......................     10,000 

Selda 3&4 Kab. Bantayan c/o Sylvia Lara........      3,000 

Portia & Henry Santillan.................................     10,000 

Edith Lazaga & Family .................................     10,000

Patring Abellana ..........................................       5,000

Glenn & Nancy Abarquez..............................          500 

Arman & Nenen Quijada................................          500 

Kab. Suba ...................................................      24,000 

Kab. Isdaan  ...............................................        7,800 

Kab.Tabtuy .................................................      10,900 

Kab. Kalubihan............................................      25,000 

Kab. Cayam ...............................................      14,000 

Anonymous ...............................................       10,000 

Kab. Bantayan  ..........................................        9,000 

Kab. Cantao-an ..........................................        6,970 

Stella Saldon ..............................................        1,000 

Kab. Panaghiusa ........................................      10,000

Regolito Gentacutan....................................        1,000 

Anonymous gikan sa Kab. Magtalisay...........      10,000 

World Apostolate of Fatima(WAF) ................       3,000   

Fr. Alvin Codilla .........................................      12,000 

Sacred Heart of Jesus................................        2,000

     Alang niadtong buot mutampo duol lang sa kombento.

19th Sacerdotal Anniversary ni Fr. Alvin gihugupan

Fr. Alvin Codilla

Naghugop ang mga parokyano sa simbahan niadtong Huybes sa hapon Hunyo 16, 2011 aron pagduyog sa 19th Sacerdotal Anniversary kun ika 19 ka tuig sa kasumaran sa pagkapari ni Fr. Alvin Codilla.

     
Ang maong selebrasyon gisugdan sa usa ka santos nga misa sa hapon ug gisunod dayon ang salo-salo nga giandam sa parokyano sa Tuyan.

     
Si Sis. Lydia Lapitan, presidente sa Parish Pastoral Council ug kaubanan maoy nipasiugda sa programa  pinaagi sa usa ka interpretation

dance sa kantang “God Give Me You” sa PYCC.

  
Pipila usab ka mga parokyano ang nipresentar sa ilang talento sa pagkanta ug ingon man “hand miming” agi og pagpasalamat sa mga parokyano sa kura paroko.

      
May trivia question usab nga gipahigayon ug gisalmotan sa mga parokyano ilabina sa mga membro sa laing-laing kahugpungan sa simbahan.
      
Sa katapusan, si Fr. Alvin nitunol usab sa iyang dakong  pagpasalamat sa taga Tuyan tungod sa pagsuporta ug pag-ampo alang  kaniya.

Fiesta sa Sagrado Corazon de Jesus

Gisugdan na niadtong Hunyo 22, 2011 ang pagnobena sa Sagrado Corazon de Jesus sa dili pa ang santos nga misa matag hapon.

    
Matud pa sa presidente sa kapunungan sa Sagrado Corazon de Jesus nga si Terry Natingor sa Hulyo 1, 2011 adlaw nga Biyernes gisaulog sa kapistahan sa ilang gidebosyon.

     
Sigon pa ni Sis Terry nga atol sa kapistahan sa Sagrado de Jesus gipahigayon ang mubo nga prosesyon sa alas 4:00 sa hapon ug gisunod ang santos nga misa sa alas 5:30 sa hapon.

    
Human sa santos nga misa may gahimo ang mga membro sa kapunungnan og gamay nga salo-salo. Gigamit sa kapunungan sa ilang gastahan mao ang ilang matag tuig nga tampo nga muabut sa 145 pesos matag membro. (Annjie Babayson)

 

Mga PSG Volunteers gi-instar na

Hingpit nang na-instar ang 23 ka mga Parish Security Group kun PSG volunteers atol sa santos nga misa sa alas 8:00 sa buntag niadtong adlaw nga Domingo, Hunyo 26 ning tuiga.

     
Sa wala pa ang installation, si Fr. Alvin Codilla nipatin-aw sa dakong tahas sa mga membro sa PSG nga naglangkob sa pagbantay sa propedad sa parokya sa Tuyan ilabina sa simbahan kay anaa ang Santisimo ug ang pag-assess sa mga kalihukan sa simbahan ilabina sa mga parokyanong musimba.

     
Suma pa ni Sis. Bebot Dizon, ang  chairperson sa Ministry on Service ug maoy nipaila sa mga PSG volunteers, nga ang pangulo sa PSG mao si Brod Sandy Adlawan.

    
Ang mga adviser mao  sila si Brod. Bert Ruiz  ug si Brod. Eddie Gutierrez. Human niini, gisunod dayon ang gamay sa salo-salo sa konbento.(Jeralyn Deiparine)

Handmaid of the Lord may Enrichment Retreat

Niadtong Hunyo 25, 2011 adlaw nga Sabado, ang Handmaid of the Lord sa parokya sa Tuyan nipahigayon og Enrichment Retreat didto sa usa sa mga lawak saringanan sa Tuyan Central School.

     
Gisugdan ang maong retreat sa mga alas 7:30 ang takna sa buntag ug gitapos sa hapon.

    
Ang nangulo sa maong kalihukan mao sila si Telly Natingor, Lourdes Natad ug ingon man sila si Sis. Taling ug Sis. Bebie Mabida sa pa-rokya sa Tuyan.

     
 Gawas sa mga membro sa Handmaid of the Lord dinhi sa parokya sa Tuyan, ang nahisgutang Enrichment Retreat gitambungan usab sa 20 ka mga membro sa susamang grupo nga taga dakbayan sa Naga.

     
Mabulukon ang maong retreat tungod kay daghan man sila og nakat-unan sa pagpuyo isip mapuslanong kristohanon.

     
Ang topic sa naasoy nga retreat naghisgut sa relasyon sa atong Labaw nga Makagagahum ug unsa usab kita ngadto Kaniya. (Jeralyn Deiparine)

Mga kalihukan sa Silver Anniversary gihan-ay na

     Nasabutan sa kadagkoan sa simbahan sa Tuyan nga ilusad sa sunod Domingo, Hul-yo 10, 2011 ang mga kalihukan sa simbahan alang sa Silver Anniversary kun ika-25 ka tuig nga kasumaran sa pagkaparoka sa Our Lady of the Holy Rosary Parish sa ba-rangay Tuyan siyudad sa Naga sa umaabut Oktobre 12 ning tuiga.

     Atol sa special meeting sa mga opisyales ug mga membro sa Parish Pastoral Council niadtong Domingo, Hunyo 26, 2011, hingpit nga natakda ang mga kalihukan sa Silver Anniversary nga gilangkuban sa musunod:

Motorcade

     Oktobre 1 – pagahimuon ang Grand Motorcade sa tibuok Bikaryato sa alas 2:00 sa hapon nga manukad gikan sa simbahan sa Tuyan pai-ngon sa Tabunok liko sa San Isidro lahos sa Talisay city.

     Gikan sa Talisay muhapit kini sa Mohon mubalik sa Highway dayon mupa-ingon sa Cantao-an, mubalik sa highway paingon sa Naga city ngadto sa Langtad, mutuyok paingon balik sa Naga city ug muliko paingon sa Uling dayon mutuyok paingon balik dinhi sa simbahan sa Tuyan.

Meeting

     Oktobre 2 (Domingo) - ipahigayon sa PPC officials ang follow up meeting.

Novena

     Oktobre 3 (Lunes) - pagasugdan ang unang adlaw sa misa nobena sa kapistahan sa Our Lady of the Holy Rosary Pa-rish sa alas 7:00 sa gabii. Ug sa pagka alas 8:30 sa gabii ipahigayon ang Ms./Mrs. Kabanayan chairperson.

Nites with Mary

     Oktobre 4 (Martes) -  pagahimuon ang mga kanta alang sa Mahal nga Berhin sa Nite with Mary sama sa stelo sa Kabarangayan sa Parish Youth Coordinating Council kun PYCC. Human niini ipahigayon usab ang PYCC Grand Reunion.

PPC Nites

     Oktobre 5 (Miyerkules) - pagahimuon ang PPC Nites sa alas  8:30 sa gabii.

Renewal of Vows

     Oktobre 6 (Huybes) - sa alas 10:00 ang takna sa buntag ipahigayon ang renewal of vows sa napiling 25 ka mga magtiayon sa parokya. Ug sa pagka alas 8:30 sa gabii ang Barangay Officials Nites ang pagahimuon.

Dinner for a Cause & Concert

     Oktobre 7 (Biyernes) - sayohon ang misa nobena nga pagasaulugon sa alas 5:30 sa hapon kay sa alas 7:30 sa gabii mao na ang Dinner for a Cause ug sa alas 8:30 usab ang Concert sa Cebu Clergy Performing Arts adto sa hawanan sa Tuyan Central School.

Disco

     Oktobre 8 (Sabado) - usa ka Disco ang pagahimuon sa alas 8:30 sa gabii.

Mass Wedding

     Oktobre 11 (Martes) -  pagahimuon ang Mass Wedding sa alas 10:00 sa buntag alang sa mga nagpuyopuyo sulod na sa  lima ka tuig pataas. Sa pagka-alas 2:00 sa hapon may motorcade alang sa  Prince and  Princess ug sa alas 8:30 sa gabii ang Coronotion Nites.

     Samtang sa alas sa 4:30 sa hapon ang prosesyon sa Biyesperas sa Kapistahan sa Our Lady of the Holy Rosary.

Pontifical Mass   

     Oktobre 12 (Miyerkules) - ang Pontifical Mass pagahimuon sa alas 10:00 ang takna sa buntag uban sa  Presider & Preacher, Cebu Archbishop Jose Palma.

     Sa alas 7:00 sa gabii, ang dinner alang sa 25 ka mga outstanding parishioners ug uban pang mga awardees ug sa alas 8:30 sa kagabii ang ilang opisyal nga Recognition and Awarding.

     Samtang gitataw ni Fr. Alvin nga ang PPC officials muhikay na usab sa mga gikinahanglanong rekisitos aron madeklarar ni Cebu Archbishop Jose Palma ang Our Lady of the Holy Parish sa Tuyan nga “Year of Grace” nunut sa kasaulogan sa Silver Anniversary sa parokya sa Tuyan.

     Gipasabut ni Fr. Alvin nga sa higayon nga ang parokya sa Tuyan madeklarar nga  “Year of Grace,” ang simbahan mahimo na usab nga usa ka “pilgrim church” sa tibuok tuig sugod sa Oktobre 12, 2011 hangtud sa sunod tuig ug gipaabut nga daghan unya ang mubisita sa parokya.