PPC evaluation and planning pagahimuon

      Nasabutan sa mga membro sa Parish Pastoral Council kun PPC ang pagpahigayon og PPC Evaluation and Planning sa adlaw nga Domingo, Nobyembre 13, 2011.

     Magsugod ang tunga sa adlaw nga evaluation and planning sa mga membro sa PPC human sa paniudto.

     Gipaabut nga planohan pag-ayo ang mga kalihukan sa parokya sa sunod tuig apil na niini ang mga kalihukan sa nagpadayong pagsaulog sa 25th Parish Anniversary ug ang pagpaubos sa parokya sa “Year of Garce.”

Piniliay sa PPC ipahigayon

     Si Fr. Alvin Codilla nipahibawo nga base sa constitution and by-laws sa Parish Pastoral Council kun PPC sa parokya sa Tuyan, ang o-pisyales sa PPC makahupot lamang og duha ka tuig nga termino apan mahimo kining mapili pag-usab pero makasilbe lang og laing usa ka termino.

     Tungod niini, giuyunan sa mga opisyales ug mga membro ang pagpahigayon og piniliay sa PPC officials ug WESTY Chairmen.

     Matud pa ni Fr. Alvin nga subayon niini ang naandan nga proseso sa pagpapili gikan sa pag-nominate ug tulo ka mga kandidato, pagkuha sa commitment sa gi-nominate, pagtigum sa tanang nominado ug ipahigayon ang piniliay.

     Sigon pa sa Padre Kura nga pagasugdan ang pagproseso sa pagdawat og nomination karong adlaw nga Lunes, Nobyembre 14, 2011 human ipahigayon ang PPC evaluation and planning.

     Giawhag ang tanan sa pagsalmot sa maong piniliay.

 
 

Scholarship gitanyag sa parokya

     Gipahibawo ni Sis. Bebot Dizon ang chairperson sa Mi-nistry on Service nga ang Alliance Global nitanyag sa parokya sa Tuyan og Scholarship program alang sa mga parokyano nga buot mutungha og kursong computer.

     Nidugang og pagpasabut ang usa sa mga distributor sa nahisgutang kompanya nga si Sis. Nancy Aliviano kinsa niingon nga 75 porsyento nga diskwento sa tuition fee ang ila

 

nga matanyag ngadto sa 3 ka  tawo matag Kabanayan o 27 ka mga parokyano sa Tuyan nga buot mueskoyla og  kursong computer.

     Iyang gipahibawo nga sa ilang gitanyag nga scholarship, walay age limit ug mahimong mu-qualify ang high school graduate o college level nga parokyano.

     Apan iyang gipahibawo nga ilang hatagan og prayoridad ang mga indigent ug kabos nga mga parokyano sa Tuyan.

     Ang mga tunghaan nga mahimong maeskoylahan ubos sa nahisgutang scholarship program mao ang Interface, Royal Christian College, Asian College Learning Center, Josrika Data MDA ug Uniword. Ang interesado mu-contact lang ni  Sis. Bebot sa tel. number 269-4088 ug  cell number 09279755486 o ni Sis. Ruth Reguero sa tel. number 272-7079.(Jeralyn Deiparine)

   

Pinaskuhan sa kabos giandam na

      Ang Ministry on Service nga gipangulohan ni Sis. Bebot Dizon niingon nga ang nahisgutan nga ministry nagsugod na sa pagpangandam sa “Pinaskuhan sa Kabos” ang ilang programa nga naghatag og mga pinaskuhan sa mga kabos nga parokyano dinhi sa parokya sa Tuyan.

     Matud pa ni Sis. Bebot nga ang Service Ministry nitakda sa pagpanghatag sa mga pinaskuhan ngadto sa mga indigents o kabos nga mga parokyano karong Desyembre 20, 2011 anha gihapon sa church ground hinungdan nga nagsugod na sila karon sa pagpanawat og mga gasa nga kinasingkasing ihatag sa mga parokyano sa Tuyan.

     Si Sis. Bebot niiingon nga ang dawaton nilang gasa mao ang bugas, canned goods ug mga candies.

    Si Sis. Bebot nipasabut      nga makapahimulos niining kalihukan ang tanang mga  kabanayan sa parokya sanglit  gitarget karon nilang mahatagan ang 200 ka mga kabos sa parokya.

     Alang sa buot nga mupaambit sa ilang grasya alang sa kalampusan sa kalihukan contact lang ni Sis. Bebot sa tel. number 269-4088 ug  cell number 09279755486 o ni Sis. Ruth Reguero sa tel. number 272-7079.(Jeralyn Deiparine)

 

Mga lectors & psalmist my seminar

     Ang pangulo sa Psalmists nga si Sis. Emmylou Obiedo nipahibawo nga ang Lectors and Psalmist sa parokya sa Tuyan musalmot sa ipahigayon nga seminar sa mga Lectors and Psalmist sa tibuok artsediyoses sa Sugbo.

     Matud pa ni Sis. Emmylou nga gikinahanglan nga mu-tambong sa maong seminar ang mga lectors and psalmist sa parokya sa Tuyan.

     Apan iyang gipahibawo nga ang petsa ug ang lugar sa maong seminar mag-agad lamang sa Artsediyoses sa Sugbo nga maoy mupasiugda sa nahisgutang mga kalihukan. (Annjie Babayson)

Pag-inum og ilimnong makahubog gidili sa Sakaysakay

     Gihingusgan karon sa Sakaysakay Committee nga gipangulohan sa chairman nga si Saturnino Obejero ang pagdili sa pag-inum sa ilimnong makahubog sa  mga musalmot sa Sakaysakay.

     Kini tungod kay mawad-an og bili o kamahinungdanon sa Sakaysakay nga mao ang pagpakita sa tinuoray nga debosyon ngadto sa patron sa parokya sa Tuyan ang Birhen sa Santos nga Rosaryo.

     Matud pa ni Fr.Alvin Codilla nga ang pagsalmot sa Sakaysakay usa ka timaan sa hugot nga debosyon sa usa ka deboto sa Mahal nga Birhen Maria ug dili haum nga musalmot sa kalihukan nga hubog.

     Dugang pasabut ni Fr. Alvin nga ang Sakay-sakay usa ka reliheyoso nga kalihukan aron masabwag ang kultura nga gibilin sa mga katigula-ngan nga deboto sa Mahal nga Birhen dinhi sa Tuyan busa angayan unta nga kini pagatumanon uban ang hugot nga pagtahud ug pagyukbo sa patrona sa parokya.

     Tungod niini, nasabutan sa mga sakop sa Parish Pastoral Council  atol sa gipahigayon nga monthly meeting niadtong Nobembre 6, 2011 nga dili paapilon sa Sakaysakay ang hubog, ang nakainum og bino ug ingon man ang pagdala og ilimnung makahubog.

       Kini aron malikayan ang disgrasya sa kadagatan ug labaw sa tanan matuman ang tinuig nga gimbuhaton sa so-lemne nga paagi aron kahimut-an sa patron ang gihimong Sakaysakay.

     Subay usab niini, si Fr. Alvin nisangon kang Brod. Hector Lapitan sa pagpakig-coordinate sa kapolisan  ug Philippine Coast Guard sa siyudad sa Naga ug ingon man sa mga opisyales sa barangay nga higpit nga ipatuman ang pagdili sa ilimnung makahubog sa Sakay-sakay.

     Gihangyo usab sa Padre Kura ang tanang taga Tuyan nga muabag sa katuyuan sa simbahan aron mahingpit ang pag-patronize sa Birhen Maria.

 

Mga kasinatian sa mga parokyano uban sa Birhen sa Rosaryo:

Ang itum nga kahoyng kamagong

     Si Celedonio Abadilla niingon nga niadtong 1959, bayongbayong pa siya niadto,  nasindolan sa iyang tiil ang usa ka itum nga kamagong nga kahoy didto sa Inayawan, siyudad sa Sugbo nga may tulo ka pulgada nga gilapdon, upat ka pulgada ang gitas-on ug tunga sa pulgada ang gibag-on ug sa pagtuo nga usa ka bairan iyang gibagnos sa karsada sa wala pa kini niya hingpit nga gipunit ug diha pa niya nahibaw-an nga usa kini ka itum nga kahoy kamagong.

      Ang maong kahoy gitaguan sa iyang inahan ngadto sa kaban.

     Sa tuig 1973, gioperahan sa kasingkasing ang iyang kinamagulangan nga anak didto sa Manila ug sa iyang pagbalik nisulti ang iyang inahan nga  ang nakit-an niyang kahoy mga garasgaras nga napurma og tawo busa iya kining gidala sa pagbalhin og puyo dinhi sa Tuyan ug nibutang niini sa altar aron kanunay kining makit-an.

     Niadtong tuig 1987 atol sa ikaduhang anibersayo sa pagkaparokya sa Tuyan, iyang nabantayan nga niklaro na ang garas kaniadto sa maong kahoy nga nahimong kinulit sa imahe sa Birhen sa Rosaryo, ang patron sa Tuyan, nga gitaliwad-an sa duha ka santos. 

     Alang kaniya ang tilimad-on sa itum nga kahoyng kamagong mao nga anhi siya, uban sa iyang pamilya, mag-alagad sa simbahan sa Tuyan.

 
 

Legion of Mary mag-pilgrim

      Mupahigayon usab og pilgrim ang mga sakop sa Legion of Mary dinhi sa parokya sa Tuyan karong umaabut Nobyembre 26, 2011 adlaw nga Sabado.

     Si Sis. Engine Abadilla, ang president sa Curia sa parokya niingon nga sugdan ang maong pilgrim sa Schoenstat Shrine sa Lawaan, dayon muadto usab sa Museum sa Cebu Metropolitan Cathedral ug sa pagkahapon mubisita sa dancing inmate sa CPDRC didto sa barangay Kalunasan siyudad sa Sugbo. (Charis Quiros)

 

Kompisal sa dili pa sa misa

      Nunut sa pagtugot ni Cebu Archbishop Jose Palma nga usa ka “Place of Pilgrim” ang  Our Lady of the Holy Rosary Parish nunut sa deklarasyon niini nga “Year of Grace “ ang parokya gikan sa Oktobre 12, 2011 hangtu sa Oktobre 12, 2012, si Fr. Alvin Codilla nipahibawo nga sa dili pa ang misa sa hapon, gawas sa Martes, may kompisal nga ipahigayon.

      Kini aron mas maandam ug takus ang mga parokyano sa pagdawat sa “Plenary Indulgence” o sa grasya nga gitugot sa Arsobispo sa Sugbo sa tanang mga kristiyano nga mubisita sa parokya ug mangayo og petesyon.

Daghan ang nisalmot sa Grand Motorcade

      Ang chairman sa Grand Motorcade sa pagbukas sa Parish Silver Anniversary nga si Brod. Hector Lapitan niingon nga dul-an sa 100 ka mga sakyanan ang nisalmot apil na ang mga motorsiklo.

     Matud pa ni Brod. Hector nga daghan gyud sa mga parokyano ang nasibut sa pagsalmot tungod kay sinugdanan man kini sa kasaulogan sa ika-25 ka tuig nga kasumaran sa pagkaparokya sa Tuyan.

       Samtang si Fr. Alvin Codilla nagpasalamaton kaayo sa tanang mga nisalmot sa motorkada bisan pa man sa kainit ug sa  kalayo sa rota.

Dinner for a Cause and Concert mabungahon

     Mabungahon kaayo ang pagpaghigayon sa parokya sa labing unang dinner for a cause ug concert uban sa Cebu Clergy Performing Artists.

     MAng nitambong sa moang kalihukan wala lamang nabusog sa gidalit nga pagkaon kun dili nabusog usab kini sa makalingaw nga pasiaw ug kanta sa singing priest sa Archdioceses sa Cebu.

     Si Fr. Alvin Codilla nagpasalamaton kaayo sa mga parokyano nga nitambong sa maong kalihukan nga nagtinguha sa pagtigum og pundo.

Day for the Aged gihugupan

     Kapin sa 100 ka mga edad-edaran na nga mgapanrokya sa Tuyan ang nitambong sa Day for the Aged sa mga alas 9:30 hangtud sa alas 12:30 sa udto niadtong Oktobre 9, 2011.

     Suma pa ni Sis Bibot Dizon, pangulo sa Ministry on Service nga nalingay kaayo ang mga tigulang sa parokya sa gipangdalit nilang mga kantay, sayaw, pagkaon ug mga give aways nga mga souvenir items nga gidonar nila ni Sis. Lydia Lapitan, Joy Ariar, Nicy Cantal ug Tenette Acapulco.

     Ang main sponsor sa maong kalihukan mao sila si Hydie ug Eugene Rama and Daclan Family. Kini gisugdan sa pag-ampo ni Fr. Alvin Codilla ug giabagan sa CWL Sr. ug Jr., Knight of Columbus, Handmaid of  the Lord, CRM, Couples for Christ, CAPS-R ug PSG.

     Gigpasidunggan isip oldest participant si Agapito Natingor, 88 anyos, Whiteland. (JD)

Parish Silver Anniversary malampuson

     Nagmalampuson ang pagsaulog sa parokya sa Tuyan sa Parish Silver Anniversary kun ika-25 ka tuig nga kasumaran sa pagkatukod sa Our Lady of the Holy Rosary Pa-rish niadtong Oktobre 12, 2011 dihang nisaulog sa Pontifical Mass ang Arsobispo sa Sugbo, Most Rev. Jose Palma kinsa niingon nga nalapay kaayo siya sa kadaghan sa mga parokyano nga nitambong sa misa sa iyang labing unang pagbisita sa parokya.

    Si Most Rev. Palma mipahalipay sa taga Tuyan ug nipadayag nga sa kasaulog sa Parish Silver Anniversary sa parokya sa Tuyan angay lantawon ang kasaysayan niini, muhangop sa kasamta-ngan uban ang kasibut ug mulantaw sa kaugmaon nga puno sa paglaum.

      Mipasabut si Most Rev. Palma nga sa pagtan-aw og balik sa pagkatukod sa pa-rokya, 25 na tuig ang nakalabay, angayang makita ang kahamtong na sa pagtoo sa  umaabut ang mga parokyano mulaum sa panabang sa Patron, ang Birhen sa Santos nga Rosaryo Iyang giklaro sa matag suliran nga muhapak sa matag magtutuo ug wala nay laing kapaingnan dili kalimtan ang pagluhod atubangan sa Birhen ug mangadye sa santos nga rosaryo.

     Gisaulog ni Most Rev. Palma ang Pontifical Mass uban ni Auxiliary Bishop Areola, Episcopal Vicar Msgr. Esteban Binghay ug laing tulo ka mga monsinyoray ug 13 ka mga bisitang pari apil sa duha ka mga kanhi kura paruko sa Tuyan nga si Fr. Nestor Soriano ug Fr. Leopolpo “Jun” Palacio Jr. .

      Sa wala pa natapus ang Pontifical Mass, si Fr. Alvin Codilla nibasa sa deklarasyon

nga gipirmahan ni Most Rev. Palma nga nagdeklarar sa Our Lady of the Holy Rosary Parish nga ubos sa “Year of Grace” gikan sa Oktobre 12, 1011 hangtud sa Oktobre 12, 2012 nga nagpasabut nga ang simbahan sa Tuyan nahimong “pilgrim center” sulod sa usa ka tuig alang sa tanang mga

katoleko diin gitugot sa Arsobispo sa Sugbo ang “Plenary Indulgence” alang sa katoleko nga mubisita sa simbahan, mupadangat sa pag-ampo sa Labaw nga makagagahum, mangadye sa usa ka Amahan Namo, usa ka Maghimaya ka Maria, Usa ka Himaya sa Amahan ug ang Kredo sa mga Apostoles.

     Agi ug paghangop ni Most. Rev. Palma sa mga taga Tuyan, siya nipaamen sa mga

parokyano nga niduol kaniya atubangan sa altar sa pagkahuman na sa Pintifical Mass nga gitambungan halos tanang mga parokyano sa parokya sa Tuyan.

.

Renewal of vows 25 ka mga parisan

     Ang Education Ministry inabagan sa ubang mga organization sa simbahan malampuson nga nipahigayon sa renewal of vows sa 25 ka mga magtiayon nga nagsaulog sa ilang ika25 ka wedding anniversary.

     Si Fr. Alvin Codilla maoy napasiugda sa renewal of vows sa 25 ka parisan ug mao usab ang nitunol sa ilang pasidungog sa pagpabiling lig-on sa saad-saad sa kaminyoon.

   Human sa renewal of vows sa 25 ka magtiayon, gisunod ang naandan nga paghinungitan og cake ug pag-inum og bino sa matag paris ug gisunod usab dayon ang gamy nga salosalo. (Jeralyn Deiparine)

Parokya sa Tuyan gideklarar nga "Year of Grace"

     Formal nang gideklarar ni Cebu Archbishop Jose Palma  D.D. ang Our Lady of the Holy Rosary Parish sa Tuyan, City of Naga Cebu nga “YEAR OF GRACE” nunut sa kasaulogan sa parokya sa Silver Anniversary kun ika-25 ka tuig nga kasumaran sa pagkaparokya sa simbahan sa Tuyan niadtong Oktobre 12, 1986.

     Magsugod og epekto ang gideklarar ni Most Rev. Palma nga “YEAR OF GRACE” sa Oktobre 12, 2011 hangtud sa Oktobre 12, 2012.

     Si Most Rev. Palma nilagda sa maong deklarasyon niadtong Septembre 13, 2011 didto sa Archdiocesan Chancery sa siyudad sa Sugbo human usab giduso sa Padre Kura sa parokya sa Tuyan, Rev. Fr. Alvin Codilla ug mga opisyales sa Parish Pastoral Council kun PPC nga gipangulohan ni Sis. Lydia Lapitan ang hangyo alang sa nahisgutan nga katuyuan.

     Sigon sa maong deklarasyon, si Most Rev. Palma nii-ngon nga gikan sa Oktobre 12, 2011 hangtud sa Oktobre 12, 2012  ang Our Lady of the Holy Rosary Parish sa Tuyan, City of Naga, Cebu usa na ka “PLACE OF PILGRIMAGE,” usa ka pagtugot sa Arsobispo ngadto sa matag usa ka  katoleko gikan sa parokya ug sa gawas sa parokya sa Tuyan nga musalmot sa liturgical celebration okaha mubisita sa Our Lady of the Holy Rosary Parish sa Tuyan nga makabaton og “PLENARY INDULGENCE” human sa pag-ampo sa mga intention ngadto sa Balaang Amahan ug pagpangadye sa usa ka Amahan Namo, usa ka Maghimaya ka Maria, usa ka Himaya sa Amahan ug  ang Credo sa Pagtuo.

     Si Fr. Alvin nagpalasamaton kaayo ni Most Rev. Palma sa gipirmahan niining deklarasyon sanglit mao kini ang makahatag og spirituhanong kahulogan o kasolemne sa kasaulogan sa Silver Anniversary sa parokya sa Tuyan.

Sakristiya ug kombento gipintalan

     Gisugdan na sa Parokya ang pagpapintal sa sakristiya ug sa kombento  pinaagi sa pagpaningkamot sa Padre Kura, Fr. Alvin Codilla isip preparasyon sa labing unang pagbisita ni Cebu Archbishop Jose Palma kinsa maoy musaulog sa Pontifical Mass sa Silver Anniversary sa pagparokya karong Oktobre, 12,  2011

     Sigon pa Sis Lydia Lapitan,

ang PPC president, nga gikan sa kaugalingong bulsa ni Fr. Alvin ang 75 mil pesos nga gahin sa pagpapintal sa sakristiya ug kombento.

     Gitug-an ni Sis. Lydia nga ang canopy gi-construct atubangan sa kombento gihatag kini nga libre ni Vergilio ug Judith Libor agi og tabang sa simbahan aron dili na mabasa ang atubangan sa kombento panahon sa ting-ulan.

Misa ni Archbishop Jose Palma tambungan

     Gipahibawo ni Fr. Alvin Codilla nga si Cebu Archbishop Most Rev. Jose Palma mao  ang musaulog sa Pontifical Mass sa Silver Anniversary kun ika-25 ka kasumaran sa pagtukod sa Our Lady of the Holy Rosary Parish sa barangay Tuyan siyudad sa Naga, Cebu karong Oktobre 12, 2011.

     Sanglit mao man kini ang  labing unang pagmisa ni Bishop Palma sa parokya sukad kini nahimong Arsobispo sa Sugbo, si Fr. Alvin niawhag sa tanang mga parokyano nga mutagana gayud ug igong oras sa pagtambong sa Pontifical Mass ni Bishop Palma nga pagahimon sa alas 10:00 ang takna sa buntag sa Oktobre 12, 2011 aron makita sa Arsobispo ang kasibut sa paglambo ug kahingkod na sa pagtuo sa mga parokyano sa

Tuyan sulod na sa 25 ka tuig nga pagparokya sa simbahan niini.

   Si Fr. Alvin niingon usab nga ang makatambong sa Ponfical mass ni Bishop Palma makadawat og Plenary Indulgence o bindisyon sa labaw nga pa-ngulo sa simbahan dinhi sa Artsidyosesis sa Sugbo

Kasaysayan sa Patron sa Parokya sa Tuyan

      Sumala pa ni Saturnino  Obejero, 77, lumad nga taga Tuyan  nga base sa gisulti sa iyang  mga gikinakanan  nga gibanabanang sa tuig 1915 ang mga mulupyo sa Tuyan nagkapundok ug nagkasabut nga magtukod og kapilya aron sila magkatapuk sa pag-ampo sanglit layo kaayo ang simbahan sa lungsod sa Naga.  

     Matud pa ni Obejero nga gawas sa paglakaw, ang bugtang transportasyon sa mga tawo paingon sa Naga mao ang sakayan sa dagat gamit ang tukon o lig-on ug taas nga kanoy nga maoy itukod sa dagat aron musibog ang sakayan ug dili ang bugsay.

     Gisabutan usab ang pagpahigayon og kapistahan sa ilang gamay nga kapilya nga ginama lamang sa kawayan, amakan ug sulirap sa lukay sa lubi. Apan wala pa sila makapili og patron.

     Busa sila nagkasabut nga muduol sa pari sa parokya sa Naga  aron pagpangulos og imahe sa santos nga mao usab ang  himuon nilang pat-ron sa kapilya ug i-uli lamang kini human sa pagsaulog sa fiesta.

      Nisugot usab dayon ang pari sa hangyo sa taga Tuyan ug gipahulaman ang imahe sa Mahal nga Birhen sa Rosario  ug gigikuha ug gihatud og balik ang Birhen pinaagi sa pagsakay sa sakayan sa dagat.

     Niadtong higayuna, ang kapistahan sa kapilya gisaulog matag  Oktobre 7 sa tuig base sa sulti sa pari sa simbahan sa Naga.

     Paglabay sa pipila ka tuig, ang kura paruko sa Naga nalooy sa nakitang kahago sa mga katawhan sa Tuyan ug nakahunahuna kini sa pag-tugyan na lamang sa Birhen ngadto sa taga Tuyan isip ilang permaninting patron.  

     Gitigum niini ang mga parokyano sa Naga aron pagpangayo og pagtugot  niini ug gitugtan usab kini ubos sa kondisyon nga sa dili pa ang kapistahan sa kapilya ibisita una ang imahe sa Naga.

Sakay-sakay    

     Ang mga kabataan kaniadto nakakita sa ilang ginikanan nga naghatukod ug kuha sa imahe sa Mahal nga Birhen sa Rosario ngadto sa Naga ug nipadayag sa ilang dakong interest sa pag-apil og pagsakaysakay uban sa Birhen.

     Tungod sa karisgo wala kini tugti sa mga hamtung apan gitugtan ra kini sa pagpalabay sa pipila ka tuig kay halad man usab kini sa Birhen ug tungod sa kadaghan sa mga batan-on nga nisalmot ang maong kalihukan gitawag na og “sakay-sakay.”

(Mabasa ang tibuok kasaysayan sa parokya sa olhrptuyan.webs.com ang laing website sa parokya sa Tuyan)

Renewal sa mga Lay Ministers

     19 ka mga Extra-Ordinary Ministers of Holy Communion sa parokya sa Tuyan ang nihimo sa ilang renewal o pagbag-o sa ilang mga panaad sa padayon nga pag-alag sa simbahan atubangan sa padre kura Fr. Alvin Codilla ug atubangan sa altar niadtong niaging Domingo, Septembre 25, 2011.

     Ang Presidente sa Lay Ministers sa Tuyan Brod. Wilfredo Alferez niingon nga ang maong renewal kabahin sa kapistahan ni San Lorenzo Ruiz ang patron sa mga lay ministers ug sa mga Katekista niadtong sa Septembre 28,2011.

     Atol sa maong kapistahan gipahigayon una ang mubo nga prosesyon uban sa mga lay ministers ug mga katekista ug gisunod ang santos nga misa. Human niini gipahigayon ang gamay nga salo-salo sa sulod sa kombento.